रक्त

नामांकित लेखक श्री. अच्युत गोडबोले व सहलेखिका डॉ. वैदेही लिमये यांनी सखोल अभ्यास, ओघवती भाषा, विचारांची मुक्त पखरण विश्वखाणी शब्दांच्या मखरात बसवून रक्ताला वाहते ठेवले आहे कारण रक्तगंगा सतत वाहती राहिली पाहिजे, तरच जीवन सुंदर होईल. जीवन सुंदर असून ते अधिक सुंदर करण्यातच माणसाच्या जगण्याचे तथ्य आहे; कारण भवचक्र फिरत राहणार असून जीवनसंगीताने ते व्यापलेले आहे, म्हणून जीवन प्रवाही होण्यासाठी रक्त खेळते हवे. रक्ताचा सलोनी झेला या पुस्तकातून व्यक्त होतो.

वाचनीय, मननीय, चिंतनीय असे वैज्ञानिक दृष्टिकोनातून लिहिलेले, तरीही रंजक असलेले हे ज्ञान व विज्ञान आणि तत्त्वज्ञान यांची उत्तम सांगड घालते. रक्ताचे आजार, त्यावरील उपचारपद्धती, रक्तदानाचे महत्त्व आणि रक्ताचा बाजार कसा थांबवता येईल, यावर मार्गदर्शन करणारे हे पुस्तक आबालवृद्धांना उपयुक्त ठरेल, ही माझी खात्री आहे. सर्वांचे रक्त स्वच्छ, हसरे, खेळते व प्रवाही राहो. या सदिच्छा.